Blog

នេះឡានអគ្គិសនីប្រណីតកម្លាំងខ្លាំងដាច់គេ ជិះបានចម្ងាយ ៨៣២គីឡូម៉ែត្រ

ក្រុមហ៊ុន​ Lucid Motors បាន​ប្រកាស​ចេញ​ជា​ផ្លូវ​ការ​នូវ​រថយន្ត​ Sedan អគ្គិសនី​ប្រណីត​ម៉ូដែល Lucid Air ដែល​នៅ​ពេល​បំពាក់​ Option ពេញ វា​គឺ​ជា​រថយន្ត​អគ្គិសនី​ដែល​​មាន​កម្លាំង​ខ្លាំង និង​ជិះ​បាន​ឆ្ងាយ​បំផុត។

​​Lucid Air ​មាន​ចំណុច​ខ្លាំង​ជា​ច្រើន ដែល​លេច​ធ្លោ​ជាង​រថយន្ត​គូ​ប្រជែង​ម៉ូដែល Tesla Model S និង Porsche Taycan។ ក្នុង​នោះ​វា​មាន​សមត្ថភាព​សាក​បាន​​​ថាមពល​ល្បឿន​លឿន ដោយ​ការ​សាក​មួយ​នាទី អាច​ជិះ​បាន​​ដល់ ៣២​គីឡូម៉ែត្រ ដែល​មាន​ន័យ​ថា​សាក​ខ្ទង់​​ ២០​នាទី ជិះ​បាន​ចម្ងាយ​ប្រហែល ៤៨២​​គីឡូម៉ែត្រ។ រថយន្ត​នេះ​ដែរ​អាច​ជិះ​បាន​ចម្ងាយ​ដល់​ទៅ ៨៣២គីឡូម៉ែត្រ ពេល​សាក​ភ្លើង​ពេញ ខ្លាំង​ជាង Tesla Model S ដែល​ជិះ​បាន​ចម្ងាយ ៦៤៦គីឡូម៉ែត្រ។

Lucid Air នឹង​មាន​ផ្ដល់​ជម្រើស​កម្លាំង​ច្រើន​ប្រភេទ ដោយ​សម្រាប់​ប្រភេទ​ Option ខ្ពស់ៗ​វា​អាច​ផលិត​កម្លាំង​បាន​ចម្លោះ​ពី ៦២០​សេះ រហូត​ដល់ ១០៨០​សេះ តាម​រយៈ​​ការ​ប្រើ​ម៉ូទ័រ​អគ្គិសនី​ពីរ និង​ប្រព័ន្ធ​បើកបរ​ប៉ុង​ពីរ។ សម្រាប់​កម្លាំង ១០៨០សេះ អាច​ឲ្យ​រថយន្ត​នេះ​ស្ទុះ​ពី ០-៩៦គ.ម/ម៉ ក្នុង​ពេល​ត្រឹម ២,៥​វិនាទី។

ចំពោះ​តម្លៃ​វិញ Lucid Air គឺ​មាន​ចាប់​ពី​ ៨ម៉ឺន​ដុល្លារ​ រហូត​ដល់​ថ្លៃ​បំផុត​ ១៦៩ ០០០​ដុល្លារ​ ដែល​ចាប់​ផ្ដើម​លក់​លើ​ទីផ្សារ​នា​​ពាក់​កណ្ដាល​ឆ្នាំ ២០២១ ត​ទៅ៕​​​